بھارت کے آبی منصوبوں پر پاکستان کی تشویش، عالمی برادری سے کردار ادا کرنے کا مطالبہ

پاکستان نے بھارت کے چناب اپ لنک ٹنل منصوبے پر شدید تشویش کا اظہار کرتے ہوئے عالمی برادری سے مطالبہ کیا ہے کہ وہ اس معاملے میں اپنا کردار ادا کرے۔ترجمان دفترِ خارجہ کے مطابق دریائے چناب کے پانی کا رخ دوسرے دریائی نظام کی طرف موڑنا سندھ طاس معاہدے کی سنگین خلاف ورزی ہے۔
ان کا کہنا ہے کہ یہ اقدام ویانا کنونشن اور بین الاقوامی آبی قوانین کے بنیادی اصولوں کے بھی منافی ہے۔ترجمان نے بھارت کے سلال ڈیم کی ذخیرہ گنجائش بڑھانے کے منصوبے پر بھی تحفظات ظاہر کیے ہیں۔ ان کے مطابق یہ اقدام بھارت کو پانی کے بہاؤ پر ایسا کنٹرول دے سکتا ہے جو سندھ طاس معاہدے کے تحت قابلِ قبول نہیں۔
دفترِ خارجہ کے مطابق یہ منصوبے اس بات کی نشاندہی کرتے ہیں کہ پانی کو سیاسی دباؤ کے طور پر استعمال کرنے کی کوشش کی جا رہی ہے۔ پاکستان نے عالمی برادری سے اپیل کی ہے کہ وہ بھارت پر زور دے کہ وہ ایسے تمام منصوبے روکے جو پاکستان کے حصے کے پانی کے بہاؤ کو متاثر کرتے ہیں اور سندھ طاس معاہدے پر مکمل اور مخلصانہ عملدرآمد کو یقینی بنائے۔
ترجمان نے واضح کیا کہ پاکستان اپنے آبی حقوق اور قومی مفادات کے تحفظ کے لیے تمام ضروری اور دستیاب اقدامات کا حق محفوظ رکھتا ہے۔