پاکستان کو ایل این جی کا ایک اور اسپاٹ کارگو موصول، پورٹ قاسم پر جہاز لنگر انداز

اسلام آباد: پاکستان کو مائع قدرتی گیس (ایل این جی) کا ایک اور اسپاٹ کارگو موصول ہو گیا ہے، جس کے بعد ملک کے توانائی ذخائر میں اضافہ ہوا ہے۔تفصیلات کے مطابق ایل این جی بردار بحری جہاز "بی ڈبلیو ہیلیوس" پورٹ قاسم پر واقع پی جی پی ایل ٹرمینل پر لنگر انداز ہوا۔
یہ جہاز تقریباً ایک لاکھ چالیس ہزار کیوبک میٹر ایل این جی لے کر پاکستان پہنچا ہے۔ذرائع کے مطابق یہ کارگو پاکستان ایل این جی لمیٹڈ نے مسابقتی بولی کے عمل کے ذریعے حاصل کیا، جبکہ ایل این جی کی فراہمی بی پی سنگاپور کے تعاون سے ممکن ہوئی۔
حکام کا کہنا ہے کہ اس شپمنٹ سے قومی ٹرانسمیشن نیٹ ورک کے لیے اضافی گیس دستیاب ہوگی، جس سے توانائی کی ضروریات کو پورا کرنے میں مدد ملے گی۔یہ پیش رفت ایسے وقت میں سامنے آئی ہے جب ملک میں توانائی کی طلب اور رسد کے توازن کو برقرار رکھنے کے لیے اضافی ذرائع سے گیس کی درآمد جاری ہے۔