وزیراعظم شہباز شریف نے بجٹ میں تمام وعدے پورے کیے، عطا تارڑ

وفاقی وزیر اطلاعات عطا تارڑ نے کہا ہے کہ وزیراعظم شہباز شریف نے آئندہ مالی سال کے بجٹ میں اپنے تمام وعدے پورے کر دیے ہیں۔اسلام آباد میں پوسٹ بجٹ پریس کانفرنس سے خطاب کرتے ہوئے انہوں نے کہا کہ فیڈرل بورڈ آف ریونیو میں اربوں روپے کی لیکیج موجود تھی، جبکہ صرف چینی کی صنعت میں ہی تقریباً ساٹھ ارب روپے کی ٹیکس چوری یا لیکیج پائی جاتی تھی۔
ان کے مطابق سوال یہ ہے کہ تنخواہ دار طبقہ آخر چینی کی صنعت کے بوجھ کو کیوں برداشت کرے۔عطا تارڑ نے کہا کہ اصلاحات کے نتیجے میں چینی کے شعبے میں ٹیکس چوری پر قابو پایا گیا ہے، جس سے ساٹھ ارب روپے کا اضافی ریونیو حاصل ہوا ہے۔
ان کا کہنا تھا کہ ماضی میں ملک کو دیوالیہ ہونے کے خطرات کا سامنا رہا، تاہم موجودہ حکومت نے معاشی استحکام حاصل کیا ہے اور اب معیشت ترقی کی سمت گامزن ہے۔انہوں نے مزید کہا کہ ’’اپنا گھر پروگرام‘‘ ایک اہم اقدام ہے جس سے بارہ صنعتی شعبے جڑے ہوئے ہیں۔
ان کے مطابق دنیا بھر میں پاکستان کے معاشی استحکام کو تسلیم کیا جا رہا ہے۔وفاقی وزیر نے کہا کہ وزیراعظم شہباز شریف نے بجٹ میں کیے گئے تمام وعدے پورے کیے ہیں اور فیڈرل بورڈ آف ریونیو میں سفارش کے کلچر کا خاتمہ کیا گیا ہے۔ ان کے مطابق ایف بی آر میں کی گئی اصلاحات تاریخی نوعیت کی ہیں۔