پاکستان نے اسرائیلی جاسوس نیٹ ورک کو چکمہ دے کر امریکا۔ایران معاہدہ محفوظ بنایا، ذرائع کا دعویٰ

پاکستان نے ایک مؤثر اور پیچیدہ حکمتِ عملی کے تحت مبینہ طور پر اسرائیلی جاسوس نیٹ ورک کو چکمہ دیتے ہوئے امریکا اور ایران کے درمیان طے پانے والے معاہدے کے عمل کو محفوظ بنانے میں کردار ادا کیا ہے۔ذرائع کے مطابق اس حساس سفارتی عمل کے دوران خفیہ مذاکرات مختلف مقامات پر منعقد ہوئے جن میں پاکستان، قطر، عمان اور آذربائیجان شامل ہیں۔
بتایا جاتا ہے کہ بعض مراحل میں مذاکرات امریکی جنگی جہازوں پر بھی ہوئے، جہاں انتہائی خفیہ نوعیت کی بات چیت کی گئی۔ذرائع کا یہ بھی کہنا ہے کہ معاہدے کو محفوظ اور کامیاب بنانے کے لیے بعض معاملات میں ہاتھ سے لکھے گئے خطوط کا تبادلہ کیا گیا، جبکہ خفیہ معلومات کے تحفظ کے لیے سخت سیکیورٹی پروٹوکول اپنایا گیا۔
مزید دعویٰ کیا گیا ہے کہ اس پورے عمل کے دوران غلط معلومات اور فیک نیوز کے ذریعے بعض فریقین کو گمراہ کرنے کی کوشش بھی کی گئی تاکہ حساس مذاکرات کو بیرونی مداخلت سے محفوظ رکھا جا سکے۔تاہم ان دعوؤں کی آزاد ذرائع سے تصدیق نہیں ہو سکی، جبکہ متعلقہ فریقین کی جانب سے اس حوالے سے کوئی باضابطہ بیان سامنے نہیں آیا۔