حکومت کی تبدیلی سے متعلق خبریں بے بنیاد قیاس آرائیاں ہیں: وفاقی وزیر

وفاقی وزیر برائے پارلیمانی امور طارق فضل چوہدری نے حکومت کی تبدیلی سے متعلق خبروں کو محض قیاس آرائیاں قرار دیا ہے۔انہوں نے کہا کہ موجودہ حکومت مشکل ترین حالات کے باوجود بہتر انداز میں کام کر رہی ہے۔ ان کے مطابق وزیر اعظم شہباز شریف چاہیں تو کارکردگی کی بنیاد پر کابینہ میں رد و بدل کر سکتے ہیں، کیونکہ یہ ان کا اختیار ہے۔
طارق فضل چوہدری نے مزید کہا کہ مشکل حالات کے باوجود وزیر اعظم ملک کے امور احسن طریقے سے چلا رہے ہیں اور وفاقی وزرا کی کارکردگی کے مطابق انہیں تبدیل یا فارغ کرنا بھی وزیر اعظم کا اختیار ہے۔انہوں نے بتایا کہ قومی اسمبلی سے وفاقی بجٹ چوبیس جون کو منظور کر لیا جائے گا۔
ان کے مطابق اتحادی جماعتوں سے اس حوالے سے بات ہو چکی ہے اور یہ طے پایا ہے کہ پچیس اور چھبیس جون کو یومِ عاشور کی تعطیلات کے بعد قومی اسمبلی کا اجلاس دوبارہ نہ بلایا جائے۔انہوں نے آزاد کشمیر کی صورتِ حال پر بات کرتے ہوئے کہا کہ مشترکہ عوامی رابطہ کمیٹی سے مذاکرات نہیں کیے جائیں گے کیونکہ یہ کالعدم تنظیم ہے۔ .
ان کا کہنا تھا کہ پہلے انہیں پرتشدد احتجاج ترک کر کے قانون کے دائرے میں آنا ہوگا۔ انہوں نے کہا کہ آزاد کشمیر میں بارہ نشستوں کا معاملہ آئینی نوعیت کا ہے۔