مریم نواز کا کسانوں کے لیے بڑا اعلان، تین سال میں 50 ہزار ٹریکٹرز فراہم کرنے کا فیصلہ

وزیراعلیٰ پنجاب مریم نواز نے صوبے کی تاریخ میں پہلی بار آئندہ تین برس کے دوران 50 ہزار ٹریکٹرز کسانوں کو فراہم کرنے کا اعلان کرتے ہوئے کہا ہے کہ حکومت زرعی شعبے کو جدید خطوط پر استوار کرنے اور کسانوں کو خودمختار بنانے کے لیے عملی اقدامات کر رہی ہے۔
صوبائی محکمہ زراعت کے اجلاس سے خطاب کرتے ہوئے وزیراعلیٰ نے کہا کہ موجودہ حکومت نے کسانوں کو حقیقی معنوں میں بااختیار بنایا ہے، جبکہ ماضی میں کسی حکومت نے اتنی بڑی تعداد میں ٹریکٹرز فراہم کرنے کا منصوبہ پیش نہیں کیا۔اجلاس میں کسان کارڈ اور زرعی میکانائزیشن پروگرام کا تفصیلی جائزہ بھی لیا گیا۔ 
بریفنگ کے دوران بتایا گیا کہ کسانوں کو اب تک 360 ارب روپے کے بلاسود قرضے جاری کیے جا چکے ہیں، جبکہ کسان کارڈ کے تحت دیے گئے قرضوں کی واپسی کی شرح 99 فیصد رہی۔ بریفنگ کے مطابق جاری شدہ قرضوں کا 80 فیصد حصہ کھاد کی خریداری پر خرچ کیا گیا، جبکہ گزشتہ سوا دو سال سے یوریا کی قیمتیں بھی قابو میں ہیں۔
دریں اثنا وزیراعلیٰ پنجاب نے اسپیکر پنجاب اسمبلی ملک محمد احمد خان سے بھی ملاقات کی۔ اس موقع پر مریم نواز کا کہنا تھا کہ ان کا ہدف پنجاب کے ہر شہری تک حکومتی ریلیف پہنچانا اور صوبے کو ترقی کی نئی منزلوں تک لے جانا ہے۔