بڑھتی ہوئی آبادی پر قابو پانا قومی ترقی کے لیے ناگزیر، وزیراعظم شہباز شریف

وزیراعظم شہباز شریف نے کہا ہے کہ ملک میں تیزی سے بڑھنے والی آبادی پاکستان کو درپیش سب سے بڑا چیلنج بن چکی ہے، جس پر مؤثر انداز میں قابو پانا وقت کی اہم ضرورت ہے۔ انہوں نے زور دیا کہ آبادی میں توازن قائم رکھنے اور بہبودِ آبادی کے اقدامات کو قومی ذمہ داری کے طور پر اپنایا جائے، کیونکہ متوازن آبادی ہی پائیدار ترقی اور خوشحالی کی بنیاد ہے۔
بہبودِ آبادی سے متعلق ایک اہم اجلاس کی صدارت کرتے ہوئے وزیراعظم نے متعلقہ اداروں کو نیشنل اسٹیبلائزیشن پلان 2026ء تا 2035ء تیار کرنے کی ہدایت جاری کی۔ ان کا کہنا تھا کہ آبادی کی منصوبہ بندی کو قومی ترقی، معاشی استحکام اور انسانی وسائل کی بہتری کے اہداف سے ہم آہنگ کیا جائے۔
وزیراعظم نے ہدایت دی کہ بہبودِ آبادی کے پروگراموں پر مؤثر عملدرآمد کے لیے وفاق اور صوبوں کے درمیان تعاون اور رابطوں کو مزید مضبوط بنایا جائے تاکہ بہتر نتائج حاصل کیے جا سکیں۔