سرحدی دراندازی کسی صورت قبول نہیں، پاک فوج ملکی دفاع کے لیے تیار ہے: جنرل عامر رضا

ایبٹ آباد: کمانڈر نیشنل اسٹریٹجک کمانڈ جنرل سید عامر رضا نے واضح کیا ہے کہ پاکستان کی مسلح افواج ملک کے ہر حصے کے دفاع کے لیے ہمہ وقت تیار ہیں اور سرحد پار سے کسی بھی قسم کی دراندازی کو برداشت نہیں کیا جائے گا۔پاکستان ملٹری اکیڈمی (پی ایم اے) کاکول میں منعقدہ پاسنگ آؤٹ پریڈ سے خطاب کرتے ہوئے جنرل سید عامر رضا نے کامیاب ہونے والے کیڈٹس اور ان کے اہل خانہ کو مبارک باد پیش کی۔
انہوں نے نوجوان افسران سے خطاب میں کہا کہ ملکی سلامتی، خودمختاری اور قومی وقار کا تحفظ ان کے کندھوں پر ایک اہم ذمہ داری ہے۔ انہوں نے زور دیا کہ کیڈٹس اپنی پیشہ ورانہ زندگی میں فرض شناسی کا مظاہرہ کریں اور درپیش چیلنجز کا ہمت اور عزم کے ساتھ مقابلہ کریں۔
جنرل سید عامر رضا نے کہا کہ دیانت داری، بہادری اور جرات ایک کامیاب قیادت کی بنیادی خصوصیات ہیں، جنہیں افسران کو اپنے فرائض کی انجام دہی کے دوران ہمیشہ مقدم رکھنا چاہیے۔انہوں نے خواتین کیڈٹس کی شرکت کو باعثِ فخر قرار دیتے ہوئے کہا کہ پاک فوج نے مختلف شعبوں میں اپنی صلاحیتوں کا بھرپور مظاہرہ کیا ہے۔
کمانڈر نیشنل اسٹریٹجک کمانڈ نے خطے کی موجودہ کشیدہ صورت حال کا ذکر کرتے ہوئے کہا کہ پاکستان نے عالمی سطح پر مثبت کردار ادا کیا ہے۔ ان کے مطابق علاقائی کشیدگی کم کرنے کے لیے پاکستان کی جانب سے ثالثی کی کوششوں کو بین الاقوامی سطح پر بھی دیکھا گیا ہے۔