ایف بی آر افسران سے غیر ملکی شہریت اور پاسپورٹس کی تفصیلات طلب

ایف بی آر نے کسٹمز اور ان لینڈ ریونیو کے افسران کو غیر ملکی شہریت اور سفری دستاویزات سے متعلق ڈیکلریشن فوری جمع کرانے کی آخری یاد دہانی کرا دی ہے۔ایف بی آر ترجمان کے مطابق غیر ملکی شہریت اور پاسپورٹس سے متعلق ڈیکلریشن جمع کرانے کی 90 روزہ مدت 30 اگست کو ختم ہوچکی ہے، تاہم متعدد افسران نے تاحال مطلوبہ فارم جمع نہیں کرائے۔
نئی ہدایات کے تحت کسٹمز اور ان لینڈ ریونیو سمیت تمام متعلقہ افسران و اہلکاروں کے لیے اپنی اور اپنے اہل خانہ کی غیر ملکی شہریت سے متعلق تفصیلات فراہم کرنا لازمی قرار دیا گیا ہے۔اس کے علاوہ غیر ملکی پاسپورٹس رکھنے اور کسی غیر ملکی شہری سے شادی کی صورت میں بھی متعلقہ معلومات ظاہر کرنا ضروری ہوگا۔
ایف بی آر نے ہدایت کی ہے کہ مخصوص فارم ای میل کے ذریعے متعلقہ سیکریٹریز کو فوری جمع کرایا جائے۔ایف بی آر کے مطابق ڈیکلریشن جمع نہ کرانے یا غلط معلومات فراہم کرنے کی صورت میں سول سرونٹس ایفیشنسی اینڈ ڈسپلن رولز کے تحت ’مس کنڈکٹ‘ اور بدانتظامی کی کارروائی کی جائے گی۔