مومنہ اقبال کا ثاقب چدھڑ کے خلاف ہر فورم سے رجوع کرنے کا اعلان

اداکارہ مومنہ اقبال نے کہا ہے کہ وہ اپنے ساتھ پیش آنے والے مبینہ واقعے پر خاموش نہیں رہیں گی اور معاملے کے خلاف ہر دستیاب فورم سے رجوع کریں گی۔عدالت کے باہر میڈیا سے گفتگو کرتے ہوئے مومنہ اقبال کا کہنا تھا کہ اگر کسی کی بہنوں کی عزت کے ساتھ کھیلا جائے اور کوئی پوچھنے والا نہ ہو تو یہ صورتحال قابل قبول نہیں ہونی چاہیے۔
اداکارہ نے الزام عائد کیا کہ این سی سی آئی اے میں مبینہ ملی بھگت کے ذریعے تفتیش کا رخ تبدیل کیا گیا، جبکہ انہیں تفتیش میں تبدیلی سے متعلق آگاہ بھی نہیں کیا گیا۔مومنہ اقبال نے کہا کہ وہ ثاقب چدھڑ کے خلاف موجود تمام شواہد سوشل میڈیا پر سامنے لائیں گی اور اس معاملے پر ہر متعلقہ فورم سے رجوع کریں گی۔
ان کے مطابق انہیں صلح کی پیشکشیں بھی کی گئیں، تاہم انہوں نے صلح سے انکار کردیا۔اداکارہ کا کہنا تھا کہ متعدد افراد نے انہیں یہ کہہ کر خاموش رہنے کا مشورہ دیا کہ ان کی شادی ہوچکی ہے، لیکن انہوں نے اپنے ساتھ ہونے والی مبینہ زیادتی کے خلاف آواز اٹھانے کا فیصلہ کیا۔مومنہ اقبال نے مزید کہا کہ وہ اس معاملے کو منطقی انجام تک پہنچانے کے لیے قانونی اور دیگر متعلقہ فورمز پر اپنی جدوجہد جاری رکھیں گی۔