رواں سال 18 لاکھ ٹن مزید گندم پیدا ہوگی: محکمہ خوراک

لاہور: محکمہ خوراک کے ذرائع کا کہنا ہے کہ پاکستان اس سال مجموعی کھپت سے 18 لاکھ ٹن زیادہ گندم پیدا کرے گا۔
ذرائع کے مطابق پاکستان میں ہر شہری سالانہ 115 کلو آٹا استعمال کرتا ہے اور پاکستان کی سالانہ کھپت 28 ملین ٹن ہے۔
رواں سال چاروں صوبوں میں گندم کی پیداوار کا ہدف 3 کروڑ 21 لاکھ ٹن مقرر کیا گیا ہے تاہم اس سال گندم کی پیداوار کا تخمینہ 2 کروڑ 96 لاکھ ٹن ہے۔
ذرائع کا کہنا ہے کہ پنجاب کو 12 کروڑ 78 لاکھ افراد کے لیے 1 کروڑ 47 لاکھ ٹن گندم اور بیج کے لیے پنجاب کو 8 لاکھ 72 ہزار ٹن گندم کی ضرورت ہے جب کہ پنجاب کی گندم کی ضرورت 1 کروڑ 55 لاکھ 55 ہزار ٹن ہے۔ محکمہ خوراک کے ذرائع کے مطابق پنجاب کا 24.1 ملین ٹن، سندھ کا 4.4 ملین ٹن، خیبرپختونخوا کا 1.4 ملین ٹن اور بلوچستان کا 1.3 ملین ٹن پیداوار کا ہدف مقرر کیا گیا ہے۔