افغانستان کرکٹ ٹیم کے کھلاڑی گلبدین نائب کا کہنا ہے کہ آسٹریلیا کے خلاف جیت ہماری کرکٹ کی بڑی کامیابی ہے۔
یاد رہے کہ آئی سی سی ٹی 20 ورلڈ کپ کے سپر ایٹ مرحلے میں افغانستان نے کینگروز کے خلاف پہلی بار آسٹریلیا کو شکست دی تھی۔
افغان کھلاڑی گلبدین نائب کی بہتر کارکردگی نے ٹیم کی کامیابی میں اہم کردار ادا کیا اور انہیں 20 رنز کے عوض 4 وکٹیں لینے پر میچ کا بہترین کھلاڑی بھی قرار دیا گیا۔
میچ کے بعد گفتگو کرتے ہوئے گلبدین نائب نے کہا کہ ہم اس کا طویل عرصے سے انتظار کر رہے ہیں،
یہ نہ صرف میرے لیے بلکہ میرے ملک اور میرے لوگوں کے لیے بہت اچھا لمحہ ہے۔
گلبدین نائب کا کہنا تھا کہ یہ ہماری کرکٹ کے لیے ایک بڑی کامیابی ہے،
ہمارے کیرئیر اور کرکٹ کے سفر کو سپورٹ کرنے پر شائقین کا شکریہ، یہ ایک بہترین ٹیم ورک ہے،
ہم نے گزشتہ دو ماہ میں سخت محنت کی جس کا نتیجہ یہاں ہے۔
