قومی کرکٹ ٹیم کے کھلاڑیوں کی ماہانہ تنخواہوں سے متعلق معلومات سامنے آگئی ہیں۔
میڈیا رپورٹس کے مطابق پاکستان کرکٹ بورڈ (پی سی بی) کے مطابق کیٹیگری اے کے کھلاڑیوں کو 45 لاکھ روپے اور کیٹیگری بی کے کھلاڑیوں کو 30 لاکھ روپے ماہانہ ملتے ہیں۔
پاکستان کرکٹ ٹیم کے حالیہ معاہدوں کے مطابق کیٹیگری اے کے کھلاڑیوں کی ماہانہ تنخواہ میں 202 فیصد جبکہ بی کیٹیگری کے کھلاڑیوں کی ماہانہ تنخواہ میں 144 فیصد اضافہ کیا گیا ہے
پی سی بی کی جانب سے قومی کرکٹرز کے نئے کنٹریکٹ کا اعلان گزشتہ سال ستمبر میں کیا گیا تھا جس میں قومی کرکٹرز کو ان کی کارکردگی کی بنیاد پر اے، بی، سی اور ڈی کیٹیگریز دی گئی تھیں۔
پی سی بی کی جانب سے جاری کردہ فہرست کے مطابق بابر اعظم، شاہین آفریدی اور محمد رضوان کو اے کیٹیگری میں شامل کیا گیا ہے۔
اے کیٹیگری کے تین کھلاڑیوں کی ماہانہ تنخواہ 45 لاکھ روپے مقرر کی گئی۔
بی کیٹگری میں شامل کھلاڑیوں کو ماہانہ 30 لاکھ روپے تک معاوضہ دیا جارہا ہے۔ بی کیٹگری میں شاداب خان، فخر زمان، حارث رؤف اور نسیم شاہ شامل ہیں۔
سی اور ڈی کیٹگری کھلاڑی ساڑھے 7 سے 15 لاکھ روپے تک ماہانہ تنخواہ لے رہے ہیں۔ سی کیٹگری میں عماد وسیم جبکہ ڈی کیٹگری میں افتخار احمد، حسن علی اور صائم ایوب شامل ہیں۔
خیال رہے کہ اس کے علاوہ تینوں فارمیٹ کے مطابق مقررہ میچ فیس اور میچ ایوارڈز بھی قومی ٹیم کے کھلاڑیوں کے حصے میں آتے ہیں۔
