عید کے دنوں میں موسم کیسا رہے گا؟

کراچی میں عید کے دنوں میں موسم مرطوب رہنے کا امکان ہے۔
موسمیات کے تجزیہ کار اویس حیدر نے عید کے دنوں میں موسم کی پیشگوئی کرتے ہوئے کہا کہ عید کے دنوں میں دن کے وقت مطلع جزوی طور پر ابر آلود رہے گا۔
انہوں نے کہا کہ جنوب مغرب سے اچھی رفتار سے ہوائیں چلتی رہیں گی، صبح اور رات کو سمندری بادل چھائے رہیں گے جبکہ زیادہ سے زیادہ درجہ حرارت 33 سے 35 ڈگری سینٹی گریڈ رہنے کا امکان ہے۔
اویس حیدر نے کہا کہ فی الحال کراچی میں بارش کا کوئی امکان نہیں، کراچی میں مون سون جون کے آخر یا جولائی کے شروع میں شروع ہوسکتا ہے، مون سون اگست کے آخر تک وقفے وقفے سے جاری رہنے کا امکان ہے۔
موسمیات کے تجزیہ کار کے مطابق 13 جون کے بعد صبح اور رات کے اوقات میں بوندا باندی کا امکان ہے۔
شہر میں اس وقت گرمی کی لہر کا کوئی امکان نہیں، دن کے وقت ہوا میں نمی کا تناسب 50 سے 60 فیصد جبکہ رات کے وقت ہوا میں نمی کا تناسب 80 سے 90 فیصد تک پہنچ سکتا ہے۔