زکریا یونیورسٹی ملتان سولر پارک سے سالانہ 12 لاکھ یونٹ بجلی کی پیداوار
ملتان ( خصوصی رپورٹر)بہاءالدین زکریا یونیورسٹی ملتان میں 736 کلو واٹ کے سولر پارک کی تعمیر کے لیے ورک آرڈر جاری کر دیا گیا۔ سولر پارک کی تعمیر تین مہینوں میں مکمل ہوگی۔ پراجیکٹ ڈائریکٹر الیکٹریکل زکریا یونیورسٹی ملتان پروفیسر ڈاکٹر عبدالستار ملک نے بتایا کہ بہاء الدین زکریا یونیورسٹی میں سولرائزیشن کے منصوبے کو قانونی اور تکنیکی عوامل کو مدنظر رکھتے ہوئے ایک سلسلہ وار اور مربوط انداز میں آگے بڑھایا جا رہا ہے۔
اسی سلسلے کی ایک کڑی کے طور پر 736 کلو واٹ کے سولر پارک کی تعمیر کے لیے ورک آرڈر جاری کر دیا گیا ہے۔ ابتدائی طور پر اس منصوبے کی لاگت کا تخمینہ آٹھ کروڑ 60 لاکھ روپے تھا لیکن شفاف ٹینڈرنگ پروسس کی بدولت اس ٹینڈر کا ورک آرڈر سات کروڑ 17 لاکھ روپے میں جاری ہوا۔ نتیجتا ٹینڈرنگ پراسیس میں شفافیت کی بدولت یونیورسٹی کو تقریبا ڈیڑھ کروڑ روپے سے زائد کی بچت ہوئی ہے۔ اس منصوبے سے سالانہ 12 لاکھ یونٹ سے زائد بجلی پیدا ہوگی اور یہ منصوبہ 15 سے 16 مہینے کی قلیل مدت میں اپنی لاگت پوری کر لے گا۔
ڈاکٹر عبدالستار ملک نے بتایا کہ منصوبے کے اگلے مرحلے میں یونیورسٹی کے تمام واٹر پمپنگ پوائنٹس کو بھی سولرائز کر دیا جائے گا اور اس سے اگلے مرحلے میں ایک مربوط حکمت عملی سے یونیورسٹی کی مختلف عمارتوں کے اوپر بھی سولر سسٹم نصب کیے جائیں گے۔ڈاکٹر عبدالستار ملک نے بتایا کہ بہاءالدین زکریا یونیورسٹی ملتان کے بجٹ کا ایک خاطرخواہ حصہ بجلی کے بلوں کی مد میں صرف ہوتا ہے۔ مالی سال 2023-24 میں زکریا یونیورسٹی ملتان کا بجلی کا ٹوٹل بل تقریبا 55 کروڑ روپے تھا۔
ڈاکٹر عبدالستار ملک کا کہنا تھا کہ اندھا دھند سولرائزیشن مسئلے کا حل نہیں ہے۔ انہی عوامل کو مدنظر رکھتے ہوئے زکریا یونیورسٹی ملتان کے الیکٹریکل ونگ نے ابتدائی طور پر پچھلے ایک سال میں بجلی کی ترسیل میں موجود مسائل کو حل کرنے کی کوشش کی اور بلنگ کے معاملات میں شفافیت کو یقینی بنایا۔ نتیجتا زکریا یونیورسٹی ملتان کا مالی سال 2024-25 کا مجموعی بل تقریبا 43 کروڑ روپے رہا۔ جو کہ اس سے پچھلے مالی سال کے مقابلے میں 12 کروڑ روپے کم ہے۔
وائس چانسلر بہاؤدین زکریا یونیورسٹی ملتان ڈاکٹر زبیر اقبال بجلی کے سسٹم کی مجموعی بہتری اور سولرائزیشن کے حوالے سے خصوصی دلچسپی لے رہے ہیں۔ وائس چانسلر زکریا یونیورسٹی ملتان نے الیکٹریکل ونگ کی کارکردگی پر اطمینان کا اظہار کیا ہے۔ اور اس امید کا اظہار کیا ہے کہ انشاءاللہ بہاءالدین زکریا یونیورسٹی ملتان مالی سال 2025 26 کے اختتام تک بجلی کے بل میں مزید خاطر خواہ کمی لانے میں کامیاب ہو جائے گی۔
یوٹیوٹ کی ویڈیو دیکھنے کے لیے یہاں کلک کریں
