ایران معاہدے کے لیے سنجیدہ ہے، بہتر معاہدہ ہوگا: امریکی صدر ڈونلڈ ٹرمپ

امریکی صدر ڈونلڈ ٹرمپ نے کہا ہے کہ ایران معاہدہ کرنے میں سنجیدہ ہے اور دونوں ممالک کے درمیان ایک بہتر معاہدہ طے پانے کا امکان موجود ہے۔اپنے ایک پیغام میں انہوں نے کہا کہ ایران معاہدہ کرنا چاہتا ہے اور یہ معاہدہ نہ صرف امریکا بلکہ ان تمام ممالک کے لیے بھی بہتر ہوگا جو امریکا کے ساتھ شراکت داری میں ہیں۔
ٹرمپ کے مطابق سیاسی مخالفین غیر ضروری طور پر ان پر تنقید کر رہے ہیں، جس سے سفارتی اور انتظامی معاملات متاثر ہوتے ہیں۔ انہوں نے کہا کہ بعض حلقے کبھی مذاکرات کو تیز کرنے اور کبھی سست کرنے کا مشورہ دیتے ہیں، جو متضاد اور غیر مددگار ہے۔
انہوں نے مزید کہا کہ سیاسی مخالفین انہیں مختلف اور متضاد مشوروں سے الجھانے کی کوشش کرتے ہیں، تاہم انہیں چاہیے کہ وہ پرسکون رہیں اور صورتحال کو بہتر انداز میں سمجھیں۔امریکی صدر کا کہنا تھا کہ بعض لوگ انہیں جنگ کرنے یا نہ کرنے جیسے متضاد مشورے دیتے ہیں، تاہم ان کے مطابق آخرکار معاملات بہتری کی طرف جائیں گے۔