امریکا سے معاہدہ قریب، جنگ کے خاتمے پر پیش رفت جاری ہے: عباس عراقچی

ایران کے وزیر خارجہ عباس عراقچی نے کہا ہے کہ امریکا کے ساتھ جنگ کے خاتمے سے متعلق معاہدہ طے پانے کے قریب ہے اور امکان ہے کہ اس کے نتیجے میں آبنائے ہرمز کو بھی بحری آمدورفت کے لیے کھول دیا جائے گا۔ایک ٹی وی انٹرویو میں گفتگو کرتے ہوئے عباس عراقچی نے کہا کہ دونوں فریقین اس وقت معاہدے کے پہلے سے کہیں زیادہ قریب ہیں۔
ان کے مطابق یہ معاہدہ آئندہ ایک یا دو روز میں یا چند دنوں کے اندر طے پا سکتا ہے، جبکہ اس میں مجموعی طور پر 14 نکات شامل ہوں گے جن کی تفصیلات عوام کے سامنے لائی جائیں گی۔ایرانی وزیر خارجہ نے ملکی میڈیا پر زور دیا کہ وہ غیر مصدقہ اطلاعات اور قیاس آرائیوں سے گریز کرے، کیونکہ ایسی خبریں مذاکراتی ماحول کو متاثر کر سکتی ہیں۔ 
انہوں نے بتایا کہ مجوزہ مفاہمتی یادداشت اگرچہ مختصر ہے، تاہم اس کی تیاری اور مختلف شقوں پر دو ماہ سے زائد عرصے تک تفصیلی مذاکرات کیے گئے ہیں اور ہر نکتے کا بار بار جائزہ لیا گیا ہے۔عباس عراقچی کا کہنا تھا کہ مذاکراتی عمل اور پیش رفت سے متعلق قومی سلامتی کونسل اور دیگر متعلقہ سکیورٹی اداروں کو مسلسل آگاہ رکھا گیا ہے۔ 
انہوں نے مزید کہا کہ مسلح افواج نے بھی اہم معاملات، بالخصوص آبنائے ہرمز اور جنگ کے خاتمے سے متعلق امور پر گہری نظر رکھی ہوئی ہے۔