ماضی کے تجربات سے سیکھا، اب بہتر حکمتِ عملی کے ساتھ ٹیم کی قیادت کروں گا: بابر اعظم

پاکستان ٹیسٹ ٹیم کے کپتان بابر اعظم نے کہا ہے کہ ماضی کے تجربات نے انہیں بطور قائد بہت کچھ سکھایا ہے اور اب وہ بہتر منصوبہ بندی، واضح حکمتِ عملی اور مثبت سوچ کے ساتھ ٹیم کی قیادت کرنے کے لیے تیار ہیں۔پاکستان کرکٹ بورڈ (پی سی بی) کی پوڈکاسٹ میں گفتگو کرتے ہوئے بابر اعظم نے کہا کہ قومی ٹیم کی قیادت کرنا ہمیشہ ان کے لیے اعزاز کی بات رہی ہے۔
ان کے مطابق وقت گزرنے کے ساتھ ایک کپتان کے فیصلوں میں پختگی اور سوچ میں مزید وضاحت آتی ہے، اسی لیے انہوں نے اپنے گزشتہ فیصلوں کا جائزہ لے کر ان سے سیکھنے کی کوشش کی۔انہوں نے کہا کہ نوجوان کھلاڑیوں کی حوصلہ افزائی اور مشکل وقت میں ان کا ساتھ دینا ان کی اولین ترجیح ہے۔ 
وہ مسلسل کھلاڑیوں سے رابطے میں رہتے ہیں تاکہ ان کا دباؤ کم ہو اور وہ اعتماد کے ساتھ اپنی صلاحیتوں کا اظہار کر سکیں۔بابر اعظم کا کہنا تھا کہ ٹیم میں ڈسپلن، فٹنس اور بہترین کارکردگی پر کسی قسم کا سمجھوتہ نہیں کیا جائے گا۔
انہوں نے بتایا کہ نیشنل کرکٹ اکیڈمی (این سی اے) کا ریڈ بال کیمپ ٹیم کی تیاری میں انتہائی مفید ثابت ہوا، جہاں مشکل حالات میں ٹریننگ کے ذریعے کھلاڑیوں کی صلاحیتوں کو مزید نکھارا گیا۔