ایرانی عوام سے احترام سے بات کریں، ورنہ مختلف انداز میں جواب ملے گا: ایران کا ٹرمپ کو سخت پیغام

ایران کی سپریم نیشنل سکیورٹی کونسل کے سیکرٹری محمد باقر ذوالقدر نے امریکی صدر ڈونلڈ ٹرمپ کے حالیہ بیانات پر سخت ردعمل دیتے ہوئے کہا ہے کہ ایرانی قوم کے ساتھ احترام کے ساتھ بات کی جائے، بصورت دیگر مناسب جواب دیا جائے گا۔
ایرانی خبررساں ایجنسی کے مطابق محمد باقر ذوالقدر نے اپنے بیان میں کہا کہ ماضی میں بھی ڈونلڈ ٹرمپ نے ایران کی ہزاروں سال پرانی تہذیب کے خاتمے جیسے بیانات دیے تھے، تاہم ان کا انجام ناکامی، مایوسی اور بعد ازاں مذاکرات و جنگ بندی کی درخواستوں کی صورت میں سامنے آیا۔
انہوں نے کہا کہ ایرانی قوم دھمکیوں سے مرعوب ہونے والی نہیں۔انہوں نے امریکی صدر کو خبردار کرتے ہوئے کہا کہ ایرانی عوام کے ساتھ احترام کا رویہ اختیار کریں، ورنہ ایران اپنی مرضی کے انداز میں جواب دینے کی صلاحیت رکھتا ہے۔
ادھر ایرانی خبررساں ایجنسی کے مطابق وزیر ثقافت سید عباس صالحی نے بھی سماجی رابطے کے پلیٹ فارم ایکس پر جاری اپنے بیان میں امریکی مؤقف کو تنقید کا نشانہ بنایا اور ایران کے مؤقف کی حمایت کا اظہار کیا۔