وفاقی آئینی عدالت نے مونال ریسٹورنٹ سے متعلق سپریم کورٹ کا سابق فیصلہ کالعدم قرار دے دیا

وفاقی آئینی عدالت نے مارگلہ ہلز میں واقع مونال ریسٹورنٹ سے متعلق سپریم کورٹ کا سابق فیصلہ کالعدم قرار دیتے ہوئے قرار دیا ہے کہ زمین کی ملکیت کا حتمی تعین متعلقہ ٹرائل کورٹ کرے گی۔مونال ریسٹورنٹ کیس میں اہم پیش رفت سامنے آئی ہے۔ 
وفاقی آئینی عدالت نے سی ڈی اے اور میٹروپولیٹن کارپوریشن کی اپیلیں منظور کرتے ہوئے واضح کیا کہ زمین کی ملکیت کا مقدمہ تاحال متعلقہ سول کورٹ میں زیر سماعت ہے، لہٰذا اس معاملے پر فیصلہ بھی ٹرائل کورٹ ہی کرے گی۔
عدالت نے اپنے فیصلے میں ہدایت کی کہ ٹرائل کورٹ مقدمے کی سماعت سپریم کورٹ کی سابقہ آبزرویشنز سے متاثر ہوئے بغیر قانون اور دستیاب شواہد کی بنیاد پر کرے۔ ساتھ ہی زیر التوا مقدمات کو جلد نمٹانے کی بھی ہدایت دی گئی۔
وفاقی آئینی عدالت نے مزید قرار دیا کہ انتظامی نوعیت کے معاملات متعلقہ ریگولیٹری اداروں کے دائرہ اختیار میں رہیں گے، جبکہ زمین کی ملکیت سے متعلق قانونی تنازع کا فیصلہ ٹرائل کورٹ کرے گی۔