حوثی حملوں پر سعودی اتحادی افواج کا سخت ردعمل، بھرپور جواب دینے کا اعلان’

سعودی اتحادی افواج نے حوثی فورسز کی جانب سے کیے جانے والے حملوں کا بھرپور اور مؤثر جواب دینے کا اعلان کر دیا ہے۔یمن میں سعودی اتحادی افواج کے ترجمان میجر جنرل ترکی المالکی نے کہا ہے کہ حوثیوں کی جانب سے شہریوں اور شہری تنصیبات کو نشانہ بنایا گیا، جو ان کے انتہاپسندانہ طرزِ عمل اور خطے میں کشیدگی بڑھانے کی پالیسی کو ظاہر کرتا ہے۔
ترجمان کا کہنا تھا کہ اتحادی افواج ان حملوں کا ذمہ داری اور مکمل عزم کے ساتھ جواب دیں گی۔ حوثی فورسز کا مقابلہ کرنے کے لیے تمام ضروری دفاعی اور عملی اقدامات کیے جائیں گے۔اس سے قبل سعودی قیادت میں قائم فوجی اتحاد نے بتایا تھا کہ پیر کے روز حوثی فورسز نے سعودی عرب کو بیلسٹک میزائلوں اور ڈرونز کے ذریعے متعدد حملوں کا نشانہ بنایا۔
جن کے نتیجے میں 13 شہری زخمی ہوئے۔واضح رہے کہ ایک روز قبل یمنی حوثیوں نے سعودی عرب کے کنگ خالد ایئربیس پر بیلسٹک میزائلوں اور ڈرونز سے حملہ کرنے کا دعویٰ کیا تھا۔