برطانیہ میں کووڈ اور فلو کے کیسز بڑھنے لگے، اسپتالوں پر دباؤ میں اضافہ

لندن: برطانیہ میں سرد موسم کی آمد کے ساتھ کووڈ-19، موسمی فلو اور سانس کی نالی کو متاثر کرنے والے دیگر وائرل انفیکشنز کے کیسز میں اضافہ ہونے لگا ہے، جس کے باعث اسپتالوں میں مریضوں کی تعداد بڑھ رہی ہے۔ رپورٹس کے مطابق فلو کے مریضوں میں 40 فیصد اضافہ ریکارڈ کیا گیا ہے۔
برطانوی میڈیا کے مطابق درجہ حرارت میں کمی اور لوگوں کے زیادہ وقت بند مقامات پر گزارنے کے باعث وائرس کی منتقلی تیز ہو رہی ہے۔ اس صورت حال کے نتیجے میں طبی مراکز پر مریضوں کا دباؤ بڑھنے لگا ہے۔تازہ اعداد و شمار کے حوالے سے بتایا گیا ہے کہ کووڈ-19 اور موسمی فلو سے متاثرہ افراد کو اسپتالوں میں داخل کرانے کی شرح میں اضافہ دیکھا جا رہا ہے۔
ان میں بالخصوص بزرگ شہری اور پہلے سے دائمی بیماریوں کا شکار افراد شامل ہیں، جنہیں انفیکشن کے باعث زیادہ پیچیدگیوں کا سامنا ہو سکتا ہے۔ماہرینِ صحت نے خبردار کیا ہے کہ اگر احتیاطی تدابیر اختیار کرنے اور ویکسینیشن پر مناسب توجہ نہ دی گئی تو اسپتالوں کی ہنگامی خدمات اور انتہائی نگہداشت کے شعبوں پر دباؤ مزید بڑھ سکتا ہے۔
حکام اور طبی ماہرین نے شہریوں کو مشورہ دیا ہے کہ وہ موسمی فلو اور کووڈ-19 سے بچاؤ کے لیے تجویز کردہ ویکسین لگوائیں، رش والی جگہوں پر ضرورت کے مطابق ماسک استعمال کریں اور ہاتھوں کی صفائی کا خصوصی خیال رکھیں۔