امریکا نے ایران کے ساتھ جنگ کا آغاز نہیں کیا،امریکی صدر ڈونلڈ ٹرمپ

امریکی صدر ڈونلڈ ٹرمپ نے ایران پر امریکا کے خلاف کئی دہائیوں سے محاذ آرائی جاری رکھنے اور ہزاروں امریکی فوجیوں کی ہلاکتوں کا ذمہ دار ہونے کا الزام عائد کیا ہے۔ٹیکساس میں ایک ریلی سے خطاب کرتے ہوئے ڈونلڈ ٹرمپ کا کہنا تھا کہ امریکا نے ایران کے ساتھ جنگ کا آغاز نہیں کیا، بلکہ ان کے بقول ایران 1979 سے امریکا کے خلاف جنگ لڑ رہا ہے۔
امریکی صدر نے دعویٰ کیا کہ ایران کے اقدامات کے باعث ہزاروں امریکی فوجی ہلاک ہوئے۔ انہوں نے سابق امریکی قیادت کو تنقید کا نشانہ بناتے ہوئے کہا کہ ماضی کے حکمرانوں کو کئی دہائیاں پہلے ہی ایران کے خلاف کارروائی کرنی چاہیے تھی، تاہم ان کے پاس ایسا کرنے کی ہمت یا مناسب حکمت عملی موجود نہیں تھی۔
اپنے خطاب کے دوران ٹرمپ نے آبنائے ہرمز سے تیل کی ترسیل میں اضافے کا بھی ذکر کیا۔ اس موقع پر انہوں نے اشارہ دیا کہ مستقبل میں اس اہم آبی گزرگاہ کا نام تبدیل کرکے ’’آبنائے ٹرمپ‘‘ رکھا جا سکتا ہے۔ٹرمپ کے ان بیانات میں ایران کے ساتھ امریکا کی طویل کشیدگی، سابق امریکی حکومتوں کی پالیسیوں اور خطے میں تیل کی ترسیل سے متعلق معاملات نمایاں رہے۔