امریکا اور اسرائیل کا ایران پر ممکنہ بڑے فوجی حملوں کا منصوبہ، ایک ہفتے تک کارروائی کا امکان

امریکی میڈیا نے دعویٰ کیا ہے کہ امریکا اور اسرائیل ایران کے خلاف بڑے پیمانے پر فوجی کارروائی کی تیاری کر رہے ہیں، جبکہ معاہدہ طے نہ پانے کی صورت میں یہ کارروائی ایک ہفتے تک جاری رہ سکتی ہے۔امریکی نیوز ویب سائٹ ایگزیوس (Axios) کی رپورٹ کے مطابق، امریکا میں وسط مدتی انتخابات کے بعد ایران کے خلاف ممکنہ حملوں کا منصوبہ زیرِ غور ہے۔ ان حملوں میں ایرانی قیادت، توانائی کے شعبے اور جوہری تنصیبات کو نشانہ بنائے جانے کا امکان ظاہر کیا گیا ہے۔
رپورٹ میں بتایا گیا ہے کہ اسرائیلی آرمی چیف ایال زمیر اور امریکی کمانڈر بریڈ کوپر کے درمیان بھی فوجی کارروائی کی تیاریوں کے حوالے سے رابطہ ہوا ہے۔دوسری جانب قطر، پاکستان، سعودی عرب، مصر اور ترکیہ امریکا اور ایران کے درمیان مذاکرات بحال کرانے کی کوششوں میں مصروف ہیں۔ 
رپورٹ کے مطابق، ثالثی کرنے والے ممالک ایران کو متاثرہ جوہری تنصیبات تک معائنہ کاروں کو رسائی دینے پر آمادہ کرنے کی کوشش کر رہے ہیں۔ایگزیوس کی رپورٹ میں مزید کہا گیا ہے کہ جوہری تنصیبات تک رسائی کی اجازت دینے کے بدلے امریکا کی جانب سے ایران پر عائد بعض پابندیوں میں نرمی کی تجویز بھی زیرِ غور ہے۔واضح رہے کہ ایران پر ممکنہ حملوں سے متعلق یہ تفصیلات امریکی میڈیا کی رپورٹ سے منسوب ہیں؛ انہیں حتمی فوجی فیصلے یا کارروائی کی تصدیق نہیں سمجھنا چاہیے۔