ایران امریکا کشیدگی میں کمی کی کوششیں تیز، جنگ بندی کیلئے قطری وفد کی تہران آمد

 ایران اور امریکا کے درمیان جنگ بندی کے امکانات روشن کرنے کے لیے سفارتی رابطوں میں تیزی آگئی ہے، اس سلسلے میں ایک ہفتے کے دوران تیسری مرتبہ قطری وفد تہران پہنچ گیا۔

عرب میڈیا کی رپورٹس کے مطابق قطری وزیراعظم کے مشیر کی قیادت میں آنے والے وفد نے ایرانی وزیر خارجہ عباس عراقچی سے ملاقات کی، جس میں دونوں ممالک کے درمیان ممکنہ معاہدے کے مسودے اور جنگ بندی کے مختلف پہلوؤں پر تبادلہ خیال کیا گیا۔

رپورٹ کے مطابق مجوزہ معاہدے کی دستاویز پر گزشتہ آٹھ روز سے بات چیت جاری ہے، جبکہ قطر دونوں فریقین کے درمیان اختلافات کم کرنے اور کسی قابلِ قبول سمجھوتے تک پہنچنے کے لیے ثالثی کا کردار ادا کر رہا ہے۔

دوسری جانب سفارتی کوششوں کے باوجود خطے میں فوجی کشیدگی برقرار ہے۔ امریکی افواج کی جانب سے ایران کے اہم اسٹریٹجک جزیرے قشم کو بھی نشانہ بنائے جانے کی اطلاعات سامنے آئی ہیں۔

امریکی اخبار وال اسٹریٹ جرنل نے امریکی حکام کے حوالے سے بتایا کہ جزیرہ قشم پر کارروائی گزشتہ چند ہفتوں کے دوران کی جانے والی محدود اور خفیہ فوجی کارروائیوں کا حصہ تھی، جن کا باضابطہ اعلان نہیں کیا گیا۔

امریکی حکام کے مطابق ان کارروائیوں کا مقصد دفاعی نوعیت کا تھا اور ان کے ذریعے آبنائے ہرمز میں تجارتی جہاز رانی کو درپیش مبینہ ایرانی خطرات کی صلاحیت کو کمزور کرنا تھا۔

یوں ایک طرف قطر کی ثالثی میں جنگ بندی کے لیے مذاکرات جاری ہیں تو دوسری جانب فوجی کارروائیوں کی اطلاعات نے سفارتی کوششوں کو مزید اہم بنا دیا ہے۔