جمعیت علمائے اسلام ف کے سربراہ مولانا فضل الرحمان نے کوئٹہ میں پریس کانفرنس کرتے ہوئے کہا کہ اس وقت ملک میں ریاست کی کوئی رٹ نہیں ہے۔
مولانا فضل الرحمان نے کہا کہ خیبرپختونخوا ہو یا بلوچستان، مسلح تنظیمیں کھلے عام علاقوں کو کنٹرول کر رہی ہیں،
انہیں بلوچستان کا علم نہیں لیکن خیبرپختونخوا میں سورج غروب ہونے کے بعد تھانوں کو تالے لگ جاتے ہیں۔
مولانا فضل الرحمان نے کہا کہ انہوں نے اب آپریشن ریزولوٹ اسٹیبلیٹی شروع کرنے کا فیصلہ کیا ہے،
یہ ایک عدم استحکام کا آپریشن ہے جو ملک کو کمزور کر دے گا۔ مولانا فضل الرحمان نے کہا کہ ملک کو مزید کمزور کیوں کیا جا رہا ہے؟
جے یو آئی کے سربراہ نے کہا کہ شہباز شریف وزیراعظم نہیں ہیں، وہ صرف کرسی پر بیٹھے ہیں۔
مولانا فضل الرحمان کا کہنا تھا کہ جہاں وردی والا شخص اجلاس میں موجود ہو وہاں وردی والا ہی فیصلے کرے گا۔
کیا ہم نے پاکستان اس لیے حاصل کیا تھا کہ ہم جرنیلوں کی غلامی کریں گے؟
انہوں نے کہا کہ ہم کسی اتحاد کی مخالفت نہیں کر رہے، سیاسی لوگوں کے درمیان باہمی مشاورت جاری رہنی چاہیے، بات چیت اور مشاورت سے بہتر نتائج سامنے آئیں گے۔
انہوں نے کہا کہ ہمیں نئی سوچ کے ساتھ اہداف کا تعین کرنا ہوگا، جمہوریت اور پارلیمنٹ اپنا مقدمہ ہار چکے ہیں۔
