صو بے میں سولر مینو فیکچرنگ پلانٹ لگانا چاہتےہیں‘وزیر صنعت و تجارت

پنجاب کے وزیر صنعت و تجارت چوہدری شفیع حسین نے کہا ہے کہ وہ صوبے میں سولر مینوفیکچرنگ پلانٹ لگانا چاہتے ہیں۔
چینی سولر کمپنی کے وفد نے پنجاب کے وزیر صنعت و تجارت سے ملاقات کی، ملاقات میں پنجاب میں سولر پینل مینوفیکچرنگ پلانٹس لگانے پر تبادلہ خیال کیا گیا۔
اس موقع پر شفیع حسین نے کہا کہ پنجاب میں سولر انرجی پر سرمایہ کاری کرنے کا یہ بہترین وقت ہے اور سولر انرجی کے فروغ کے لیے لانگ ٹرم پالیسی بنائی جائے گی۔
چوہدری شفیع نے کہا کہ پنجاب میں سولر انرجی کے شعبے میں سرمایہ کاری کے بے پناہ امکانات ہیں، وہ چاہتے ہیں کہ پنجاب میں سولر مینوفیکچرنگ پلانٹس لگیں۔
انہوں نے کہا کہ حکومت سولر پینلز کی مقامی سطح پر تیاری میں سنجیدہ ہے وہ 10 سے زائد غیر ملکی سولر کمپنیوں سے مل چکے ہیں
جن میں چین، برطانیہ وغیرہ شامل ہیں، غیر ملکی سولر کمپنیوں نے پنجاب میں سرمایہ کاری میں دلچسپی ظاہر کی ہے۔