خیبرپختونخوا اور پنجاب میں مون سون کی بارشوں سے تباہی، مختلف حادثات میں 11 افراد جاں بحق، 28 زخمی

خیبرپختونخوا میں مون سون کے پہلے اسپیل نے مختلف علاقوں میں تباہی مچا دی۔ آسمانی بجلی، تیز آندھی، موسلا دھار بارش اور سیلابی ریلوں کے باعث اب تک 7 افراد جاں بحق جبکہ 19 افراد زخمی ہو چکے ہیں۔صوبائی ڈیزاسٹر مینجمنٹ اتھارٹی (پی ڈی ایم اے) کے مطابق جاں بحق افراد میں 2 مرد، ایک خاتون اور 4 بچے شامل ہیں، جبکہ زخمیوں میں 7 مرد، ایک خاتون اور 11 بچے شامل ہیں۔ 
بارشوں اور فلش فلڈ کے نتیجے میں مجموعی طور پر 38 گھروں کو نقصان پہنچا، جن میں سے 2 مکانات مکمل طور پر منہدم ہو گئے۔ خیبر، لوئر دیر، اپر دیر، مردان، شانگلہ، باجوڑ اور لوئر چترال میں جانی و مالی نقصانات رپورٹ کیے گئے ہیں۔
دوسری جانب پنجاب میں بھی بارش اور تیز آندھی کے باعث مختلف حادثات پیش آئے۔ گزشتہ 24 گھنٹوں کے دوران 4 افراد جاں بحق جبکہ 9 افراد زخمی ہوئے۔ مختلف اضلاع میں دیواریں، چھتیں اور سائن بورڈ گرنے کے واقعات رپورٹ ہوئے۔ اٹک میں دیوار گرنے سے 2 افراد جان کی بازی ہار گئے جبکہ 3 افراد زخمی ہوئے۔ خوشاب میں آسمانی بجلی گرنے سے ایک شخص زخمی ہوا۔