غیر ملکی خواتین سے مبینہ اغوا اور اجتماعی زیادتی کیس: تین ملزمان کے ڈی این اے میچ ہونے کا انکشاف

لاہور کے علاقے ڈیفنس میں غیر ملکی خواتین کے مبینہ اغوا اور اجتماعی زیادتی کے مقدمے کی تفتیش میں اہم پیشرفت سامنے آئی ہے، جہاں فارنزک رپورٹ کے مطابق تین ملزمان کے ڈی این اے نمونے مبینہ طور پر میچ کر گئے ہیں۔
تفتیشی ذرائع کے مطابق ڈی این اے میچ ہونے والے ملزمان میں نواز نامی ملزم بھی شامل ہے، جس کے بارے میں دعویٰ کیا جا رہا ہے کہ اس نے مبینہ طور پر سب سے پہلے متاثرہ غیر ملکی خاتون کو زیادتی کا نشانہ بنایا، جبکہ اس کے بعد دیگر ملزمان بھی اس واردات میں شامل ہوئے۔
ذرائع کا کہنا ہے کہ پولیس نے مجموعی طور پر آٹھ ملزمان کے ڈی این اے نمونے فارنزک تجزیے اور کراس میچنگ کے لیے لیبارٹری بھجوائے تھے، جن میں سے تین کے نتائج سامنے آ چکے ہیں، جبکہ دیگر ملزمان کے نمونوں کا تجزیہ تاحال جاری ہے۔دوسری جانب اس مقدمے میں ایک نئی پیشرفت بھی سامنے آئی ہے۔ 
تفتیشی ذرائع کے مطابق مبینہ اغوا میں استعمال ہونے والی گاڑی کی ٹکر سے متاثر ہونے والی دوسری گاڑی کے مالک نے بھی متعلقہ واقعے کے حوالے سے پولیس میں مقدمہ درج کرا دیا ہے۔نوٹ: یہ تمام معلومات تفتیشی ذرائع کے دعوؤں اور ابتدائی تحقیقات پر مبنی ہیں، جن کی عدالتی کارروائی کے دوران مزید تصدیق یا تردید ہو سکتی ہے۔