پیٹرولیم مصنوعات کی قیمتوں میں اضافے کے بعد ٹرانسپورٹ کرایوں میں 10 فیصد تک اضافہ

پیٹرولیم مصنوعات کی قیمتوں میں حالیہ اضافے کے بعد گڈز ٹرانسپورٹرز اور پبلک ٹرانسپورٹ آپریٹرز نے کرایوں میں 10 فیصد تک اضافہ کر دیا، جس سے مہنگائی کا شکار عوام پر مزید مالی بوجھ پڑ گیا ہے۔لاہور سے مختلف شہروں کے لیے چلنے والی پبلک ٹرانسپورٹ کے کرایوں میں 80 روپے سے لے کر ایک ہزار روپے تک اضافہ کیا گیا ہے۔
ٹرانسپورٹرز نے مؤقف اختیار کیا ہے کہ پیٹرولیم مصنوعات کی قیمتوں میں بار بار ردوبدل کے باعث ان کے آپریٹنگ اخراجات میں نمایاں اضافہ ہوا ہے، جس کے نتیجے میں کرایوں میں اضافہ ناگزیر ہو گیا۔ٹرانسپورٹرز کا کہنا ہے کہ ایندھن مہنگا ہونے سے نہ صرف سفری اخراجات بڑھے ہیں بلکہ اشیائے ضروریہ کی ترسیل بھی مہنگی ہو جائے گی،۔
جس سے عام صارفین مزید متاثر ہو سکتے ہیں۔دوسری جانب سیکرٹری ریجنل ٹرانسپورٹ اتھارٹی رانا محسن کا کہنا ہے کہ ٹرانسپورٹرز سے مشاورت کے بعد کم سے کم ممکنہ حد تک کرایوں میں اضافہ کیا گیا ہے۔ انہوں نے خبردار کیا کہ مقررہ نرخوں سے زیادہ کرایہ وصول کرنے والے ٹرانسپورٹرز کے خلاف سخت قانونی کارروائی عمل میں لائی جائے گی۔