کشمیر کے مسائل کا حل پیپلز پارٹی کے پاس ہے، بلاول بھٹو زرداری

پاکستان پیپلز پارٹی کے چیئرمین بلاول بھٹو زرداری نے کہا ہے کہ کشمیر کے عوام کے ووٹ اور جمہوری حق پر کسی کو ڈاکا ڈالنے کی اجازت نہیں دی جائے گی، جبکہ کشمیر کے موجودہ حالات کا حل پیپلز پارٹی کے پاس موجود ہے۔
مظفرآباد میں پریس کانفرنس کرتے ہوئے بلاول بھٹو زرداری نے دعویٰ کیا کہ ان کے پاس 30 پولنگ اسٹیشنز پر مبینہ قبضے کے شواہد موجود ہیں۔ انہوں نے کہا کہ کشمیر کے عوام ہی اپنے مستقبل کا فیصلہ کریں گے اور کسی دوسرے کو یہ حق حاصل نہیں کہ وہ ان کے فیصلے پر اثرانداز ہو۔
انہوں نے کہا کہ کشمیری عوام اس سیاسی جماعت سے نالاں ہیں جس کے ایک وزیر نے راولاکوٹ کے شہریوں کو کشمیری ماننے سے انکار کیا۔ ان کے مطابق خطے کے مسائل کا مؤثر حل صرف پیپلز پارٹی کے پاس ہے۔
بلاول بھٹو زرداری نے تجویز دی کہ تمام اسٹیک ہولڈرز مل کر ایک "سچ اور مفاہمتی کمیشن" تشکیل دیں، جو حالیہ واقعات کی غیرجانبدارانہ تحقیقات کرے۔ انہوں نے کہا کہ کمیشن کی رپورٹ آنے تک احتجاج سے گریز کیا جائے تاکہ حالات مزید خراب نہ ہوں۔چیئرمین پیپلز پارٹی نے مزید کہا کہ اگر تحقیقاتی کمیشن وزیراعظم آزاد کشمیر کو ذمہ دار قرار دیتا ہے تو وہ احتساب کے عمل کا سامنا کرنے کے لیے تیار ہیں۔