ایران کے 440 کلوگرام افزودہ یورینیم کا تاحال سراغ نہ مل سکا، رافیل گروسی

اقوام متحدہ کے جوہری توانائی کے عالمی ادارے (آئی اے ای اے) کے سربراہ رافیل گروسی نے کہا ہے کہ ایران کے 440 کلوگرام انتہائی افزودہ یورینیم کے موجودہ مقام کی تصدیق تاحال نہیں ہو سکی، جبکہ متاثرہ جوہری تنصیبات کی مرمت یا بحالی کے بھی کوئی واضح آثار سامنے نہیں آئے۔
سلامتی کونسل کو بریفنگ دیتے ہوئے رافیل گروسی کا کہنا تھا کہ امریکا اور اسرائیل کے حملوں کے بعد سے بین الاقوامی جوہری معائنہ کار ایران کی متاثرہ تنصیبات تک رسائی حاصل نہیں کر سکے۔ اس صورتحال کے باعث جوہری مواد کی موجودہ حالت اور اس کے ممکنہ طور پر دوسری جگہ منتقل ہونے سے متعلق تصدیق میں مشکلات درپیش ہیں۔
انہوں نے زور دیا کہ ایران کو جوہری مواد کی نگرانی اور اس سے متعلق بین الاقوامی معاہدوں کے تحت اپنی ذمہ داریاں پوری کرنا ہوں گی۔ ان کے مطابق عمان، پاکستان، قطر اور مصر ایران کے ساتھ مذاکرات کی بحالی کے لیے سفارتی سطح پر کوششیں کر رہے ہیں۔
آئی اے ای اے کے سربراہ نے ایران اور ادارے کے درمیان 2025ء میں طے پانے والے قاہرہ معاہدے پر دوبارہ عمل درآمد کی ضرورت پر بھی زور دیا۔ ان کا کہنا تھا کہ جوہری معائنہ کاروں کی واپسی اور تنصیبات کی صورتحال کی تصدیق کے لیے سفارتی کوششیں ناگزیر ہیں۔رافیل گروسی کے مطابق ایران کے جوہری پروگرام سے متعلق کسی بھی دیرپا معاہدے کے لیے آئی اے ای اے کی مؤثر نگرانی اور جوہری مواد کی تصدیق بنیادی اہمیت رکھتی ہے۔