ایران اور امریکا کے درمیان معاہدہ عید کے بعد متوقع، مشاہد حسین سید

پاکستان چائنا انسٹی ٹیوٹ کے چیئرمین مشاہد حسین سید کا کہنا ہے کہ ایران اور امریکا کے درمیان معاہدہ تقریباً طے پا چکا ہے اور عیدالاضحیٰ کے بعد اس پر باضابطہ دستخط کیے جانے کا امکان ہے۔مشاہد حسین سید کے مطابق دونوں ممالک کے درمیان جاری مذاکرات میں اہم پیش رفت ہوئی ہے اور معاہدے کی بیشتر شقوں پر اتفاق ہو چکا ہے۔
انہوں نے کہا کہ خطے میں کشیدگی کم کرنے کے لیے یہ معاہدہ اہم ثابت ہو سکتا ہے۔امریکی صدر کی جانب سے “معاہدۂ ابراہیمی” قبول کرنے سے متعلق بیان پر ردعمل دیتے ہوئے مشاہد حسین سید نے کہا کہ معاہدۂ ابراہیمی ناقابلِ قبول ہے اور اس کے عملی امکانات موجود نہیں۔
اسی معاملے پر سابق سیکرٹری خارجہ اعزاز احمد چوہدری نے کہا کہ پاکستان اور دیگر مسلم ممالک فلسطینی عوام کو تنہا نہیں چھوڑ سکتے۔ ان کا کہنا تھا کہ اس صورتحال میں یہ تصور بھی ممکن نہیں کہ پاکستان یا اس جیسے دیگر ممالک معاہدۂ ابراہیمی کو تسلیم کریں۔
انہوں نے زور دیا کہ فلسطین کے مسئلے کا منصفانہ حل ہی خطے میں پائیدار امن کی ضمانت بن سکتا ہے۔