پاک چین دوستی ہر آزمائش پر پوری اتری، وقت کے ساتھ تعلقات مزید مضبوط ہوئے، فیلڈ مارشل عاصم منیر

چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان اور چین کے درمیان دوستی آزمودہ ہے اور دونوں ممالک کے تعلقات وقت کی ہر کسوٹی پر ہمیشہ پورے اترے ہیں۔آئی ایس پی آر کے مطابق جی ایچ کیو راولپنڈی میں چین کی پیپلز لبریشن آرمی کے قیام کی 99ویں سالگرہ کے موقع پر تقریب منعقد ہوئی،۔
جس میں چین کے دفاعی اتاشی میجر جنرل وانگ ژونگ اور چینی سفارتخانے کے حکام نے شرکت کی۔تقریب میں پاکستان کی تینوں مسلح افواج کے سینئر افسران بھی موجود تھے، جبکہ چیف آف ڈیفنس فورسز فیلڈ مارشل سید عاصم منیر نے معزز چینی مہمانوں کا استقبال کیا۔
اس موقع پر فیلڈ مارشل عاصم منیر نے پیپلز لبریشن آرمی کو 99ویں یومِ تاسیس پر مبارکباد پیش کی اور چین کے دفاع، قومی ترقی اور عالمی امن و سلامتی کے لیے پی ایل اے کی خدمات کو سراہا۔فیلڈ مارشل سید عاصم منیر کا کہنا تھا کہ بدلتے ہوئے علاقائی اور عالمی حالات اور مختلف چیلنجز کے باوجود پاکستان اور چین کی دیرینہ دوستی مسلسل مضبوط ہوئی ہے۔