وفاقی حکومت کے خاتمے کا امکان نہیں، پیپلزپارٹی کی علیحدگی کی قیاس آرائیاں مسترد

وفاقی وزیر پارلیمانی امور ڈاکٹر طارق فضل چوہدری نے وفاقی حکومت کے خاتمے اور پیپلزپارٹی کی حکومت سے علیحدگی سے متعلق قیاس آرائیوں کو مسترد کرتے ہوئے کہا ہے کہ حکومت کو درپیش کوئی ایسی صورتحال موجود نہیں جس سے اس کے خاتمے کا امکان پیدا ہو۔
نمائندہ خصوصی سے گفتگو کرتے ہوئے ڈاکٹر طارق فضل چوہدری کا کہنا تھا کہ حکومت کے خاتمے کی خواہش کسی کی بھی ہو سکتی ہے، تاہم زمینی حقائق اس کے برعکس ہیں۔ ان کے مطابق وفاقی حکومت اپنی آئینی مدت مکمل کرے گی اور ملک میں حکومتی امور مؤثر انداز میں جاری ہیں۔
وفاقی وزیر نے آزاد کشمیر میں پیپلزپارٹی کے کردار پر بھی تنقید کرتے ہوئے کہا کہ وہاں کی قیادت بلاول بھٹو زرداری کو درست صورتحال سے آگاہ نہیں کر رہی۔ ان کا کہنا تھا کہ بلاول بھٹو زرداری شفاف انتخابات کے معاملے کو سیاسی مفادات کے لیے متنازع بنا کر صورتحال کو مزید پیچیدہ کر رہے ہیں۔
ڈاکٹر طارق فضل چوہدری نے کہا کہ آزاد کشمیر کے موجودہ حالات میں سیاسی کشیدگی بڑھانے کے بجائے ذمہ داری کا مظاہرہ کرنے کی ضرورت ہے۔ ان کے مطابق آزاد کشمیر کے انتخابات کو متنازع بنانا پاکستان اور کشمیر کاز دونوں کے مفاد میں نہیں۔