عمران خان کو حاصل سہولیات ہمیں بھی دی جائیں، اڈیالہ جیل کے قیدیوں کا عدالت سے رجوع

بانی پی ٹی آئی عمران خان کے نجی اسپتال سے علاج اور اہلخانہ سے ملاقات سے متعلق سپریم کورٹ کے حکم کی روشنی میں اڈیالہ جیل کے تین قیدیوں نے بھی اسی نوعیت کی سہولیات کے حصول کے لیے اسلام آباد ہائی کورٹ سے رجوع کرلیا۔
قیدیوں الیاس خان، محمد اسماعیل خان اور اویس الطاف نے درخواستوں میں استدعا کی ہے کہ انہیں نجی اسپتال سے علاج کرانے اور اہلخانہ سے بات چیت کی اجازت دی جائے۔اسلام آباد ہائی کورٹ کے جسٹس محمد آصف نے تینوں قیدیوں کی درخواستوں پر سماعت کی۔ 
عدالت نے سپرنٹنڈنٹ اڈیالہ جیل کو نوٹس جاری کرتے ہوئے جواب طلب کرلیا، جبکہ کیس کی مزید سماعت 27 اگست تک ملتوی کردی گئی۔درخواست گزاروں کے وکیل نے مؤقف اختیار کیا کہ ان میں سے ایک قیدی ہیموفیلیا کے مرض میں مبتلا ہے۔
، جس کا مؤثر علاج پاکستان میں فی الحال صرف شفاء اسپتال میں ممکن ہے۔وکیل کے مطابق اگر کسی قیدی کی بیماری کا علاج سرکاری اسپتال میں ممکن نہ ہو تو اسے نجی اسپتال منتقل کیا جاسکتا ہے۔ سپریم کورٹ کے فیصلے میں بھی یہ واضح کیا گیا ہے کہ علاج کے اخراجات اہلخانہ برداشت کرسکتے ہیں۔