سانحہ پمز پر وزیراعظم کا سخت ایکشن کا حکم، ایگزیکٹو ڈائریکٹر کے استعفے پر بھی غور

وزیراعظم شہباز شریف نے پمز اسپتال کے بچوں کے وارڈ میں پیش آنے والے آتشزدگی کے ہولناک واقعے پر سخت برہمی کا اظہار کرتے ہوئے انکوائری مکمل ہونے کے بعد ذمہ دار افراد کے خلاف کارروائی کی ہدایت کردی۔ذرائع کے مطابق وزیراعظم نے سانحہ پمز کے ذمہ داران کے خلاف سخت ایکشن لینے کی ہدایت کی ہے۔ 
انکوائری کمیٹی واقعے میں غفلت یا کوتاہی کے ذمہ دار افراد کا تعین کرے گی۔ذرائع کا کہنا ہے کہ وزیراعظم پمز کے ایگزیکٹو ڈائریکٹر ڈاکٹر رانا عمران سکندر کی کارکردگی پر بھی برہم ہیں۔ انکوائری کمیٹی واقعے میں ڈاکٹر رانا عمران سکندر کے کردار کا بھی جائزہ لے گی۔ذرائع کے مطابق ایگزیکٹو ڈائریکٹر پمز سے استعفیٰ طلب کیے جانے پر بھی غور کیا جارہا ہے۔
، جبکہ سانحے کی تحقیقات کا دائرہ کار مزید حکومتی شخصیات تک بڑھائے جانے کا امکان بھی ہے۔وزیراعظم نے واضح کیا ہے کہ واقعے میں غفلت کے مرتکب افراد کے خلاف انکوائری کے نتائج کی روشنی میں سخت کارروائی عمل میں لائی جائے۔