آزاد کشمیر میں انٹرنیٹ سروس کی مرحلہ وار بحالی شروع، متعدد اضلاع میں سہولت دستیاب

محکمہ داخلہ آزاد کشمیر نے ریاست میں انٹرنیٹ سروس مرحلہ وار بحال کرنے کا اعلان کردیا ہے۔ نومنتخب وزیراعظم آزاد کشمیر افتخار گیلانی کی جانب سے عوام سے کیا گیا وعدہ بھی پورا ہوگیا ہے۔محکمہ داخلہ کی جانب سے جاری نوٹیفکیشن کے مطابق مظفرآباد ڈویژن کے ضلع نیلم اور حویلی کہوٹہ میں انٹرنیٹ سروس مکمل طور پر بحال کردی گئی ہے۔
نوٹیفکیشن کے مطابق میرپور اور بھمبر میں ڈی ایس ایل سروس بحال کردی گئی ہے، جبکہ جہلم ویلی، باغ، دھیرکوٹ اور کوٹلی میں فی الحال تعلیمی اداروں اور بینکوں کو ڈی ایس ایل سروس فراہم کی جائے گی۔محکمہ داخلہ کے مطابق متعلقہ تعلیمی اداروں اور بینکوں کو وائٹ لسٹڈ ڈی ایس ایل کنکشن دیے جائیں گے۔
اداروں کے سربراہان کو حلف نامہ جمع کرانے کے ساتھ اس امر کی یقین دہانی بھی کرانا ہوگی کہ انٹرنیٹ کنکشن کو قومی سلامتی کے خلاف استعمال نہیں کیا جائے گا۔نوٹیفکیشن میں بتایا گیا ہے کہ پونچھ ڈویژن کے اضلاع راولاکوٹ اور سدھنوتی میں انٹرنیٹ سروس تاحال معطل رہے گی۔
واضح رہے کہ وزیراعظم آزاد کشمیر افتخار گیلانی نے چند روز قبل اعلان کیا تھا کہ وادی میں انٹرنیٹ سروس دو روز کے اندر بحال کردی جائے گی۔