سویڈن نے کچرے کو توانائی کا ذریعہ بنا لیا، بجلی کیلئے بیرونِ ملک سے کوڑا درآمد

اسٹاک ہوم: دنیا کے کئی ممالک میں کچرے کو ٹھکانے لگانا ایک بڑا چیلنج ہے، تاہم سویڈن نے اسی فضلے کو توانائی کے حصول کے لیے استعمال کرنے کا منفرد نظام قائم کر رکھا ہے۔ ملک میں کچرے سے بجلی پیدا کرنے والے خصوصی پلانٹس کام کررہے ہیں، جہاں فضلے کو بطور ایندھن استعمال کیا جاتا ہے۔سویڈن میں بجلی پیدا کرنے والے ان پلانٹس کی ضروریات پوری کرنے کے لیے مقامی سطح پر پیدا ہونے والا کچرا کافی نہیں ہوتا، جس کے باعث ملک دیگر ممالک سے بھی بڑی مقدار میں کچرا درآمد کرتا ہے۔
رپورٹس کے مطابق سویڈن میں ہر سال لاکھوں ٹن کچرے کو بجلی پیدا کرنے والے پلانٹس میں استعمال کیا جاتا ہے۔ فضلے کو جلانے کے عمل کے دوران ماحول میں نقصان دہ گیسوں کے اخراج کو کم کرنے کے لیے جدید فلٹریشن اور آلودگی کنٹرول کرنے والے آلات نصب کیے گئے ہیں۔کچرے سے حاصل ہونے والی توانائی گھریلو صارفین سمیت مختلف شعبوں کی بجلی کی ضروریات پوری کرنے میں استعمال ہوتی ہے، جبکہ اس طریقہ کار سے لینڈ فلز میں جانے والے کچرے کی مقدار میں بھی کمی آتی ہے۔
سویڈن کے اس ماڈل کو پاکستان کے بڑے شہروں میں بھی قابلِ غور سمجھا جاسکتا ہے۔ لاہور، کراچی اور دیگر شہروں میں کچرے کو مؤثر انداز میں جمع اور پراسیس کرکے توانائی میں تبدیل کرنے کے منصوبے صفائی کے مسائل کم کرنے کے ساتھ متبادل توانائی کے حصول میں بھی معاون ثابت ہوسکتے ہیں۔
تاہم ایسے منصوبوں کے لیے مؤثر ویسٹ مینجمنٹ نظام، جدید ٹیکنالوجی اور ماحولیاتی تحفظ کے سخت اقدامات ضروری ہوں گے، خصوصاً کچرے کو جلانے کے نتیجے میں پیدا ہونے والی آلودگی پر قابو پانے کے لیے عالمی معیار کے آلات اور نگرانی کا نظام درکار ہوگا۔