محرم الحرام کے سیکیورٹی انتظامات: بہاولپور میں فول پروف اقدامات

بہاول پور (ڈویژنل بیوروچیف) صوبائی وزیر آبپاشی محمد کاظم علی پیرزادہ کی زیر صدارت کمشنر آفس کے کمیٹی روم میں اعلی سطحی اجلاس منعقد ہوا جس میں ڈویژن بھر میں محرم الحرام کی مجالس عزاء اور جلوسوں کے انتظامات کے حوالے سے کیے گئے اقدامات کا جائزہ لیا گیا۔ اجلاس میں چیئرپرسن چیف منسٹر ڈائریکٹوریٹ آف انسپکشن اینڈ مانیٹرنگ حکومت پنجاب بریگیڈیئر (ر) بابر علاؤالدین ستارہئ امتیاز ملٹری، کمشنر بہاول پور ڈویژن مسرت جبیں، ریجنل پولیس آفیسر رائے بابر سعید، ڈپٹی کمشنر بہاول پور ڈاکٹر فرحان فاروق اور ڈی پی او محمد حسن اقبال سمیت متعلقہ محکموں کے افسران اور ویڈیو لنک کے ذریعے ڈپٹی کمشنر بہاول نگر و رحیم یار خان، ڈی پی او بہاول نگر و رحیم یار خان شریک تھے۔ صوبائی وزیر آبپاشی محمد کاظم علی پیرزادہ نے اجلاس سے خطاب کرتے ہوئے کہا کہ محرم الحرام کے جلوس و مجالس مقامات کی سیکیورٹی کے فول پروف انتظامات کو یقینی بنایا جائے اورانتظامی افسران مجالس اور محرم جلوس روٹس کی صفائی ستھرائی کے انتظامات اور دیگر سہولیات کی دستیابی کو یقینی بنائیں۔ انہوں نے کہا کہ ہم نے جذبہ حب الوطنی سے سرشار ہو کر یوم عاشور کی سکیورٹی ڈیوٹی کو ادا کرنا ہے۔ صوبائی وزیر نے انتظامی و سیکورٹی افسران کو منتظمین جلوس و مجالس، لائسنس داران اور امن کمیٹی ممبران سے رابطے میں رہنے کی ہدایت کی۔ چیئرپرسن چیف منسٹر ڈائریکٹوریٹ آف انسپکشن اینڈ مانیٹرنگ حکومت پنجاب بریگیڈیئر (ر) بابر علاؤالدین ستارہئ امتیاز ملٹری نے اپنے خطاب میں کہا کہ محرم الحرام کے پر امن انعقاد کے لئے جاری ضابطہ اخلاق کی خلاف ورزی کسی صورت برداشت نہیں کی جائے گی اوریوم عاشور پر قیام امن کو ہر صورت یقینی بنایا جائے گا۔ انہوں نے کہا کہ ضلع بھر میں سکیورٹی کے سخت انتظامات کیے جائیں، تمام ایمر جنسی ادارے ہائی الرٹ رہیں نیزداخلی اور خارجی راستوں پرچیکنگ سخت کی جائے۔ انہوں نے امن وامان کے لیے ضلع بھر کے علماء کرام،امن کمیٹی کے ممبران اورلائسنسدران سے محرم الحرام میں بھرپور تعاون کو یقینی بنانے کی ہدایت کی۔کمشنر بہاولپور ڈویژن مسرت جبیں نے اجلاس میں بتایا کہ انتظامیہ کے زیر اہتمام بہاول پور ڈویژن میں 7 تا 10 محرم الحرام جلوس و مجالس کے مختلف مقامات پر پانی کی 204سبیلیں لگائی جائیں گی۔انہوں نے کہا کہ محرم جلوس روٹس پر صفائی ستھرائی کے بہترین انتظامات کیے گئے ہیں جبکہ میپکو، سوئی گیس اور دیگر متعلقہ محکموں کے افسران و سٹاف محرم ایام میں فعال انداز میں اپنی ڈیوٹی سر انجام دیں گے۔ ریجنل پولیس آفیسر رائے بابر سعید نے اجلاس کو بتایا کہ بہاول پور ڈویژن میں 1409 مجالس اور 514 جلوسوں کے سلسلے میں سکیورٹی انتظامات مکمل ہیں اورجلوس روٹس اور مجالس کے مقامات پر سی سی ٹی وی کیمروں سے مانیٹرنگ کی جا رہی ہے۔انہوں نے کہا کہ 7 سے 10 محرم الحرام تک آرمی اور رینجرز کی کمپنیاں بھی سکیورٹی ڈیوٹی پر تعینات ہوں گی۔آر پی او نے کہا کہ عشرہ محرم الحرام میں پولیس کے 17 ہزار سے زائد جوان فرائض ادا کریں گے۔ ڈپٹی کمشنر بہاول پور ڈاکٹر فرحان فاروق نے بتایا کہ محر م الحر ام کے حوالے سے ڈی سی آفس میں قائم کنٹرول روم چوبیس گھنٹے فعال ہے۔ ڈسٹرکٹ پولیس آفیسر محمد حسن اقبال نے بتایا محرم الحرام کے جلوسوں کی فول پروف سیکورٹی کو یقینی بنانے کیلئے ضلع بھر میں ہر تحصیل کے صدر مقام پر کنٹرول روم قائم کر دیئے گئے ہیں۔ انہوں نے کہا کہ ضلع بھر میں ٹریفک پولیس پکٹس پوائنٹس بنائے گئے ہیں جو عوام الناس کو ٹریفک کے بارے میں مدد فراہم کریں گے۔ اجلاس میں ڈپٹی کمشنر بہاول پور، بہاول نگر،رحیم یار خان اور ڈسٹرکٹ پولیس آفیسر زبہاول پور، بہاول نگر اور رحیم یار خان نے محرم الحرام کے ایام میں سیکیورٹی انتظامات اور دیگر امور کے حوالے سے شرکاء کو تفصیلی بریفنگ دی۔ یوٹیوٹ کی ویڈیو دیکھنے کے لیے یہاں کلک کریں