"یوم عاشور پر امن و امان: ملتان ڈویژن میں کامیاب حکمت عملی"

ملتان (خصوصی رپورٹر) کمشنر ملتان ڈویژن عامر کریم خان نے کہا کہ یوم عاشور پر انتظامیہ،سیاسی قیادت اور امن کمیٹی سمیت مذہبی عمائدین کے عزم اور اقدامات کی بدولت امن و امان کی مثالی صورتحال رہی ۔ملتان ڈویژن کے باسیوں نے ایک بار پھر یہ ثابت کیا کہ وہ امن کے داعی ہیں اور کسی شرپسندی کی حمایت نہیں کرتے۔ انہوں نے انتظامیہ ، پولیس، میونسپل کارپوریشن ، میپکو،ریسکو 1122, سوپ ڈیفنس اور متعلقہ اداروں کی کارکردگی کو سراہتے ہوئے کہا کہ محرام الحرام پر مذہبی ہم آہنگی برقرار رکھنے اور فول پروف انتظامات پر تمام اداروں کو خراج تحسین پیش کرتے ہیں۔ ان خیالات کا اظہار انہوں نے یوم عاشور کے مرکزی جلوسوں کی مانیٹرنگ میں امن کمیٹی کے ارکان سے ملاقات کرتے ہوئے کیا۔کمشنر عامر کریم خاں نے بعد ازاں چوک حرم گیٹ پر انتظامیہ کے ہمراہ مرکزی جلوسوں کا بھی معائنہ کیا اور بریفنگ لی۔انہوں نے کہا کہ یوم عاشور کے تمام جلوس بروقت اور پرامن ماحول میں اختتام پذیر ہونا موثر اقدامات کی بدولت ہے، شہر کی فضاءکو پر امن بنانے میں تمام سٹیک ہولڈرز کا کردار ہے۔ انہوں نے کہا کہ حکومت پنجاب نے محرم الحرام کے موقع پر ہر قسم کی شر پسندی سے نمٹنے کے لیے جامع حکمت عملی مرتب کی جس کے نتیجے میں عزاداری کے تمام مراحل بخوبی سر انجام پاگئے۔کمشنر عامر کریم خاں کا کہنا تھا کہ سی سی ٹی وی کیمروں کے ذریعے ہر نقل و حرکت پر کڑی نظر رکھی گئی اور تمام عبادت گاہوں سمیت حساس مقامات پر اضافی نفری بھی تعینات کی گئی۔ یوٹیوٹ کی ویڈیو دیکھنے کے لیے یہاں کلک کریں