لاہور ہائیکورٹ کی چیف جسٹس عالیہ نیلم آج حلف اٹھائیں گی

جسٹس عالیہ نیلم آج لاہور ہائی کورٹ کی پہلی خاتون چیف جسٹس کے عہدے کا حلف اٹھائیں گی۔ لاہور ہائی کورٹ کی چیف جسٹس عالیہ نیلم کی حلف برداری کی تقریب آج صبح ساڑھے 9 بجے گورنر ہاؤس لاہور میں ہوگی ، جہاں گورنر پنجاب سردار سلیم حیدر خان ان سے عہدے کا حلف لیں گے۔ جسٹس مس عالیہ نیلم ایک ممتاز قانون دان ہیں اور انہوں نے اپنے قانونی کیریئر کا آغاز 1996 میں کیا جبکہ 2013 میں انہیں لاہور ہائی کورٹ کی ایڈیشنل جج کے عہدے پر تعینات کیا گیا۔ جسٹس عالیہ نیلم نے 16 مارچ 2015 کو مستقل جج کے طور پر حلف اٹھایا۔ جسٹس عالیہ نیلم نے بطور جج 203 مثالی فیصلے دیے۔ جسٹس عالیہ نیلم صوبے بھر کی انسداد دہشت گردی کی عدالتوں کی پہلی خاتون انتظامی جج بھی رہ چکی ہیں۔ جسٹس عالیہ نے صنفی بنیاد پر تشدد کے مقدمات کی سماعت کے لیے علیحدہ عدالتیں قائم کرنے میں کلیدی کردار ادا کیا۔