ڈاکٹر فرخندہ کی واپسی کا دعویٰ، رجسٹرار نے ویڈیو ثبوت پیش کر دیے

اسلام آباد (سپیشل رپورٹر) یونیورسٹی رجسٹرار ڈاکٹر ملائکہ رانی کا اپنے موقف میں کہنا تھا کہ وائس چانسلر نے 25 مارچ کو اپنی ذمہ داریاں دوبارہ سنبھال لی تھیں، جس کی اطلاع اسی دن ہائر ایجوکیشن ڈیپارٹمنٹ کو دے دی گئی تھی جبکہ چھٹی کی زیر التواء رخصت کی درخواست کو اسی کے مطابق نمٹانے کی درخواست کی گئی تھی۔ لہٰذا، یہ الزام کہ وائس چانسلر رخصت پر تھیں، درست نہیں ہے۔ان کا کہنا تھا کہ اسلام آباد میں اجلاس کا انعقاد چیئرپرسن سنڈیکیٹ یعنی وائس چانسلر ڈاکٹر فرخندہ منصور کی ہدایات پر ہوا، جنہیں اجلاس کے مقام کے تعین کا اختیار حاصل ہے۔ جبکہ اجلاس کے مقام کی تبدیلی کے بارے میں سنڈیکیٹ اراکین کو بروقت اطلاع دی گئی تھی۔انہوں نے دعویٰ کیا کہ اجلاس کے بعد منٹس تحریر کرتے ہوئے کسی قسم کی ترمیم یا تبدیلی نہیں کی گئی اور اصل کارروائی کو ریکارڈ کیا گیا جبکہ یونیورسٹی کے پاس اجلاس کی ویڈیو ریکارڈنگ بطور ثبوت موجود ہے۔ لہٰذا، منٹس میں ترمیم یا تبدیلی کا سوال ہی پیدا نہیں ہوتا۔ان کا کہنا تھا کہ یونیورسٹی کی جانب سے کسی بھی قسم کی جعلسازی نہیں کی گئی۔ کارروائی کی شفافیت کے حوالے سے یونیورسٹی کے پاس اجلاس کی ویڈیو ریکارڈنگ بطور ثبوت موجود ہے جبکہ یہ بیانیہ کہ ڈاکٹر فرخندہ منصور طبی طور پر فٹ نہیں ہیں، درست نہیں ہے۔ وہ خود تمام فائلوں پر فیصلے کرتی ہیں۔ یوٹیوٹ کی ویڈیو دیکھنے کے لیے یہاں کلک کریں